పప్పు దినుసుల్లోని పోషకాలు చేసే మేలెంతో!

కందిపప్పు

కందిపప్పు తినడం వల్ల జీర్ణ వ్యవస్థ పనితీరు మెరుగుపడుతుంది. దీనిలో అధిక మోతాదులో లభించే ఫోలిక్‌ యాసిడ్‌ మహిళలకు అవసరమైన కీలక విటమిన్‌. ముఖ్యంగా గర్భిణుల్లో పిండం ఎదుగుదలకు ఇది ఎంతో ముఖ్యం. కందిపప్పుని రోజూ తీసుకోవడం వల్ల శరీరానికి ప్రొటీన్లు, మేలు చేసే కొవ్వులు, కార్బోహైడ్రేట్‌లు అందుతాయి. తక్షణ శక్తిని అందిస్తాయి. వీటితో పాటు క్యాల్షియం, పొటాషియం, విటమిన్‌ బి వంటివీ పుష్కలంగా లభిస్తాయి. కందిపప్పు తింటే కొన్ని రకాల గుండె వ్యాధులు, క్యాన్సర్లతో పాటు టైప్‌-2 డయాబెటిస్‌ వంటివీ అదుపులో ఉంటాయని పరిశోధనలు చెబుతున్నాయి.

సెనగపప్పు

శాకాహారం తీసుకునేవారు సెనగపప్పును తరచుగా వంటల్లో వాడటం వల్ల దీని నుంచి తగిన మోతాదులో ప్రొటీన్లు అందుతాయి. కాపర్‌, మాంగనీస్‌ ఖనిజాలు ఎక్కువే. మధుమేహమూ అదుపులో ఉంటుంది.

మినపపప్పు

పప్పుధాన్యాల్లో ప్రొటీన్‌, ఇనుము ఎక్కువగా లభించే రకం ఇది. ఈ పప్పులోని పోషకాలకు శరీరంలో శక్తి స్థాయుల్ని పెంచి, చురుగ్గా ఉండేలా చేసే శక్తి ఎక్కువ. ముఖ్యంగా నెలసరి వయసులో ఉన్నవారి శరీరంలో ఇనుము లోపించకుండా ఉండాలంటే ఈ పప్పుకి ఎక్కువ ప్రాధాన్యం ఇవ్వాలి. అలానే మాంసాహారం తిననివారు దీన్ని తీసుకోవడం వల్ల తగినంతగా ప్రొటీన్‌ శరీరానికి అందుతుంది. అధికంగా తీసుకోవాలి. ఇది జీర్ణ ప్రక్రియను మెరుగుపరచడంలో కీలకంగా పనిచేస్తుంది. దీనిలో యాంటీ ఇన్‌ఫ్లమేటరీ గుణాలూ అధికమే.

పెసరపప్పు

దీనిలో ఎక్కువ ఫైబర్‌, తక్కువ మొత్తంలో కెలోరీలు లభిస్తాయి. దీంట్లోని ఐరన్‌, పొటాషియం, క్యాల్షియం వంటి ఖనిజాలూ తగినంతగా లభిస్తాయి. అందుకే పెసరపప్పుని తరచుగా తింటుంటే… ఎముకలు బలంగా ఉంటాయి. వేసవిలో తినడం వల్ల శరీరానికి చల్లదనం అందుతుంది.

ఎర్రకందిపప్పు

దీన్ని తినడం వల్ల రక్తప్రసరణ సక్రమంగా జరుగుతుంది. అధిక మోతాదులో లభించే ప్రొటీన్‌లు, ఎసెన్షియల్‌ అమినో యాసిడ్‌లు దీన్నుంచి శరీరానికి అందుతాయి. ఫైబర్‌, ఫోలేట్‌లతో పాటు విటమిన్‌ బి1, మినరల్స్‌ కూడా అధికమోతాదులో లభిస్తాయి. ఎర్రకందిపప్పుని తినడం వల్ల కొలెస్ట్రాల్‌ అదుపులో ఉంటుంది. ముఖ్యంగా ఆహారం తిన్న తరవాత రక్తంలోని చక్కెర పాళ్లు పెరగకుండా దీనిలోని ఫైబర్‌ నియంత్రిస్తుంది. ఇందులోని యాంటీఆక్సిడెంట్లకు బ్రెస్ట్‌క్యాన్సర్‌ రాకుండా నియంత్రించే శక్తి ఉందని చెబుతున్నాయి పలు అధ్యయనాలు.

Leave a Reply

Your email address will not be published. Required fields are marked *

Pin It on Pinterest

Share This