‘కార్మికులు విధుల్లో చేరేందుకు గడువు నేటితో ముగింపు’

అర్ధరాత్రిలోగా విధుల్లో చేరని.. RTC కార్మికులను ఎట్టిపరిస్థితుల్లో ఉద్యోగంలో చేర్చుకోవద్దని ప్రభుత్వం నిర్ణయించింది. విధుల్లో చేరేందుకు ఇచ్చిన అవకాశం ఉపయోగించుకొని… ఉద్యోగాలు కాపాడుకోవడమా లేక ఉద్యోగాలు కోల్పోయి కుటుంబాన్ని ఇబ్బందులకు గురిచేసుకుంటారో కార్మికులే తేల్చుకోవాలని సూచించింది. గడువులోగా చేరకుంటే మిగిలిన 5వేలమార్గాల్లోనూ ప్రైవేట్‌ వాహనాలకు అనుమతులివ్వాలని… అప్పుడు రాష్ట్రంలో ఆర్టీసీ ఉండదని ప్రభుత్వం స్పష్టం చేసింది.

సీనియర్​ అధికారులతో సమీక్ష

ఆర్టీసీ సమ్మె, సమ్మెవిషయంలో ఈనెల 7న హైకోర్టు విచారణ నేపథ్యంలో ముఖ్యమంత్రి కేసీఆర్ ప్రగతి భవన్‌లో మంత్రి పువ్వాడ అజయ్ కుమార్, ప్రభుత్వ ముఖ్యసలహాదారు రాజీవ్ శర్మ, సీఎస్‌ ఎస్​కే జోషి, అడ్వకేట్‌ జనరల్‌ రామకృష్ణారావు సహా… సీనియర్ అధికారులతో సమీక్షించారు. సమ్మెవిచారణ సందర్భంగా అనుసరించాల్సిన వైఖరిపై చర్చించారు.

అర్ధరాత్రితో గడువు ముగింపు

కార్మికచట్టాలు, కేంద్ర రవాణా చట్టాన్ని పరిశీలించడంతో పాటు న్యాయనిపుణుల సలహాలు తీసుకున్నారు. కార్మికుల కుటుంబాల భవిష్యత్‌.. కార్మికుల చేతుల్లోనే ఉందని సమావేశం అభిప్రాయపడింది. సమ్మె చట్ట విరుద్ధమైనదని.. కార్మిక శాఖ నివేదిక ఇచ్చినా మానవతా దృక్పథంతో ప్రభుత్వం ఇచ్చిన అవకాశం వినియోగించుకోకుంటే అర్థంలేదన్న అభిప్రాయం సమావేశంలో వ్యక్తమైంది. గడువులోగా కార్మికులు విధుల్లో చేరకుంటే, మిగిలిన ఐదువేల మార్గాల్లోనూ ప్రైవేట్ వాహనాలకు ప్రభుత్వం అనుమతులు ఇస్తుందని.. ఐదో తేదీ అనగా ఇవాళ అర్ధరాత్రి తర్వాత ఆ ప్రక్రియ ప్రారంభం అవుతుందని తెలిపింది.

దానికి కార్మికులే కారణం

అదే జరిగితే రాష్ట్రం.. ఆర్టీసీ రహిత రాష్ట్రంగా మారుతుందని… ఆ పరిస్థితికి ముమ్మాటికీ కార్మికులే కారణమవుతారని వ్యాఖ్యానించింది. హైకోర్టులో విచారణను చూపి కార్మిక సంఘాల నేతలు కార్మికులను మభ్యపెడుతున్నారని… న్యాయనిపుణుల అభిప్రాయం ప్రకారం సమ్మెవిషయంలో న్యాయస్థానం… ప్రభుత్వానికి ఎలాంటి ఆదేశాలు ఇచ్చే అవకాశం లేదని సమావేశం అభిప్రాయపడింది.

హైకోర్టు తీర్పు మరోలా ఉంటే ఆర్టీసీ, ప్రభుత్వంగానీ.. సుప్రీంకోర్టుకు వెళ్తుందన్న అభిప్రాయం వ్యక్తమైంది. కేసు సుప్రీంకోర్టుకు వెళ్తే… అక్కడ విచారణ మరింత ఆలస్యమవుతుందని తద్వారా కార్మికులకు ఒరిగేదేమీ ఉండదన్న అభిప్రాయం సమావేశంలో వ్యక్తమైంది.

సంసిద్ధత లేఖలు ఇవ్వోచ్చు

ప్రభుత్వం ఇచ్చిన గడువులోగా విధుల్లో చేరాలనుకునే కార్మికులు.. తాము పనిచేస్తున్న డిపో మేనేజర్లకే కాకుండా.. పలుచోట్ల సంసిద్ధత లేఖలు ఇవ్వోచ్చని ఆర్టీసీ ఇన్​ఛార్జీ ఎండీ సునీల్ శర్మ ఒక ప్రకటనలో తెలిపారు. కార్మికులు ఆయా జిల్లా కలెకర్‌, ఎస్పీ, ఆర్డీఓ, డీఎస్పీ, డీవీఎం లేదా రీజినల్‌ మేనేజర్‌ కార్యాలయంలో ఇవ్వవచ్చని పేర్కొన్నారు. హైదరాబాద్‌లో పనిచేసే కార్మికులు బస్‌భవన్ లేదా ఈడీ కార్యాలయాల్లో లేఖలు అందించవచ్చని తెలిపారు. రాష్ట్రవ్యాప్తంగా వివిధ చోట్ల రాత్రి వరకు వచ్చిన లేఖలన్నీ హైదరాబాద్ చేరుకుంటాయన్న ఆయన.. వాటిని ప్రభుత్వానికి పంపనున్నట్లు వెల్లడించారు. ఈ అవకాశాన్ని కార్మికులు వినియోగించుకోవాలని.. విధుల్లో చేరే కార్మికులకు అన్ని రకాల రక్షణ కల్పించనున్నట్లు పునరుద్ఘాటించారు.

Leave a Reply

Your email address will not be published. Required fields are marked *

Pin It on Pinterest

Share This