ఆ ఎమ్మెల్యే టీడీపీలోకి వస్తే ఐదు కోట్లు ఇస్తామన్నారు.. ఆయన రూ.50 కోట్లు ఇచ్చినా రానన్నారు!

విశాఖపట్నం జిల్లా మాడుగుల నియోజకవర్గంలో దివంగత ముఖ్యమంత్రి వైఎస్ రాజశేఖర్‌రెడ్డి విగ్రహాన్ని మంత్రి ముత్తంశెట్టి శ్రీనివాసరావు (అవంతి శ్రీనివాస్) ఆదివారం ఆవిష్కరించారు. ఈ సందర్భంగా ఆయన మాట్లాడుతూ.. ఎన్నికల్లో ఇచ్చిన హామీల్లోని 80 శాతం ఐదు నెలల్లోనే అమలుచేసిన ఘనత తమ ప్రభుత్వానికే దక్కుతుందని అన్నారు. గతంలో చంద్రబాబు ఐదేళ్లలో చేయలేని పనులు తమ సీఎం ఐదు నెలల్లో చేసి చూపించారని మంత్రి అవంతి పేర్కొన్నారు. టీడీపీ ప్రభుత్వ హాయంలో విచ్చలవిడిగా దోచుకున్నారని, ఈ ఐదు నెలల్లో ఎక్కడా అవినీతి జరగలేదని తెలిపారు. వర్షాల వల్లే ఇసుక కొరత ఏర్పడిందని, దీనిపై ప్రతిపక్షాలు లేనిపోని రాద్ధాంతం చేస్తున్నాయని మండిపడ్డారు.

కార్మికులు, ఆటోవాలాలకు ప్రభుత్వం అండగా నిలుస్తుందని పేర్కొన్నారు. మంత్రిగా బీమిలిని ఎంతటి ప్రాధాన్యత ఇస్తానో, మాడుగుల కూడా తనకు అంతేనని హామీ ఇచ్చారు. ఈ సందర్భంగా మంత్రి అవంతి ఆసక్తికర వ్యాఖ్యలు చేశారు. మాడుగుల వైసీపీ ఎమ్మెల్యే బూడి ముత్యాలనాయుడిని టీడీపీలోకి తీసుకొచ్చేందుకు అప్పటి ముఖ్యమంత్రి చంద్రబాబు తీవ్ర ప్రయత్నాలు చేశారన్నారు. టీడీపీలోకి వస్తే రూ.5 కోట్లు ఇస్తామని,ఎమ్మెల్యే ముత్యాలనాయుడిని తీసుకొచ్చే బాధ్యత తనకు అప్పగించారన్నారు. అయితే, ఈ విషయంలో ముత్యాలనాయుడిని తాను సంప్రదిస్తే తనకు ఐదు కోట్లు కాదు రూ.50 కోట్లు ఇస్తానన్నా వచ్చేదిలేదని తెగేసి చెప్పారన్నారు. ఆ నిజాయితీయే ఆయనను కాపాడిందని, ఎన్నికల్లో మళ్లీ మాడుగుల ప్రజలు అఖండ మెజార్టీతో గెలిపించారన్నారు.

Leave a Reply

Your email address will not be published. Required fields are marked *

Pin It on Pinterest

Share This